طول عمري و أنا بحب شهر أكتوبر فعلاً هو شهر مميز جداً الجو فيه ممتاز مش حر و بلمسة برد خفيفة و لون الشجر و هو بيبدأ يصفر و شوية غيوم تخليني كل يوم أسأل يا ترى هتمطر النهاردة؟؟ الغريبة بقى انه و لحد من حوالي أسبوع و الجو كان لسا حر و كنا بنقول دي أول مرة تحصل اننا نفضل لابسين الهدوم الصيفي لحد أكتوبر
بس أخيراً بدأ الجو يبرد شوية و كان يوم الجمعة اللي فاتت بالنسبة لي حلو جداً شوية غيوم و الشمس هادية و بالليل نسمة الهواء الباردة و الجو دا كله رجع لي أحلى ذكريات عمري
فترة الابتدائي في المدرسة و أياميها كانت المدارس بتبدأ في أكتوبر مش زي دلوقتي في سبتمبر. فاكرة كان بابا ما بيحبش يجيب العيش الفينو من الفرن بالليل علشان الزحمة و كنا ننزل معاه الصبح الساعة 6:30 نشتري العيش الفينو من الفرن اللي في ميدان سانت فاتيما و بعدين نرجع البيت نفطر و نعمل الساندويتشات و ننزل على المدرسة
كنت بحب جداً مدرستي و كنت بحب جداً الدراسة و تجليد الكراسات و الكتب أول السنة و المذاكرة رغم اني ما كنتش طالبة متفوقة أو نابغة إنما كنت طالبة عادية مستوايا معقول
حاجة كمان كنت بحبها قوي في شهر أكتوبر "رائحة الجوافة" من أول ما كانت تنزل السوق كنا على طول نشتريها في البيت و تفضل رائحتها مليا الثلاجة و المطبخ كله ما هي كانت الفواكه لسا بخيرها شوية مش زيي دلوقتي و على طول لازم عصير الجوافة باللبن علشان فيتامين سي لاننا بنكون في وقت لسا ما ظهرش البرتقال و اليوسفي و صعب الأطفال يشربوا الليمون
علشان كدا بفضل مستنيا الجوافة تيجي و لازم أشتري منها حتى لو ماشربتش منها كثير زي لما كان بابا و ماما بيصروا اننا نشربها
وحشتني يا أكتوبر و حمد الله على السلامة و لو ان بشايرك السنة دي اتأخرت عليٍَ
2 comments:
عارفه .. شميت ريحة الجوافة وحسيت لسعه البرد بتاعت ايام المدارس في اكتوبر
شفتني وانا ماشية جنب ماما اللي كانت طول عمرها تقول ان البرتقان والجوافه هما فاكتها الوحيدة والمفضلة
تحب تنقيها وتغسلها وتشمها
الجوافه فضلت احلى ذكري ليا من ماما لاني كل ما اشوفها افتكر فرحة عينها بأول بشايرها
ابتسم للجوافه واقولها كل سنة وانتي طيبة
فيروز - كل سنة وانتي طيبة وكل ذكرياتك الجميله تغلب اي ذكريات وحشة وموجعه الحياه دايما بتمنحنا فرصه الانتقاء اختيار البهجة او الشجن
خلينا نختار صح لان الموضوع يستحق كل سنة وانتي جميله زي ما انتي دايما
ربنا يخليكي يا نونا و مش محتاجة أقول لك قد ايه كانت ست جميلة بتنشر الفرحة حواليها
يا ريت لو دايماً ذكراها تجيب لك السعادة مش الحزن لانها أكيد أحسن مننا و في مكان أفضل
كل أكتوبر و انتي طيبة و غرقانة جوافة D:
Post a Comment