ها قد أتى الخريف

بحب فصل الخريف

أغلب الناس بتقول الربيع أجمل فصول السنة و دا طبعاً علشان الورد و ألوانه و الخضرة الجميلة بس لو جينا للجو هنلاقي الجو بيبقى مش حلو تراب و خماسين و مائل للحر

أما في الخريف فالجو بيكون مثالي

بحب نسمة الهواء المائلة للبرودة و قت الصبح بدري و وقت المغربية

بحب صوت حفيف الأشجار

بحب لون ورق الشجر الأصفر و البرتقالي

بحب رائحة الجوافة و عصير الجوافة باللبن و عسل النحل اللي كنا بنشربه من بداية السنة الدراسية و طول شهر أكتوبر اللي هو موسم الجوافة يعني

بحب شرب الكاكاو الساخن

الخريف بالنسبة لي هو أحلى فصول السنة و ها قد أتى

بس السنة دي مش عارفة أستمتع بيه بس بحبه

و بدون وعي بخلي هاجر كمان تحبه و تحب كل الطقوس اللي بحبها فيه و هي نفسها عندها الاستعداد و مش هنكر Winnie the Pooh ساعدني شوية بالفيلم اللي جبته لها من قريب

علشان في الفيلم بوه كان بيحتفل ببداية الخريف و ورق الشجر المتساقط الملون و الكاكاو السخن و عسل النحل و بما إنها متعلقة جداً بيه فحبت الحاجات دي كمان

و يستمر حلمي بإني أحضر بداية الخريف في مكان يكون مليان أشجار طويلة و ضخمة علشان أشوف ألوان ورق الشجر الجميلة و يكون فيه كوخ خشب فيه دفاية و على بحيرة ماء عذب و أكمل كل الخريف و الشتاء هناك في المكان دا أشرب كل الكاكاو و الهوت شوكليت اللي في الدنيا كلها و أحط البطانية الصوف على أكتافي قدام الدفاية و أنا لابسة الشراب الصوف بدون أي ملمح من ملامح التكنولوجيا غير جهاز اسطوانات أسمع فيه نغمات الموسيقى الهادئة و آلاف من الكتب أقرأها مع كل أكواب الكاكاو الساخنة و عصير الجوافة الممكنة

رغم اني من مواليد الصيف و بالتالي المفروض أكون بحب الصيف إلا إني أعلنها على الملأ أنا بحب الخريف و مغرمة بالشتاء

و كل خريف و شتاء و احنا كلنا طيبين

الحمد لله الذي لا يحمد على مكروه سواه

أولاً و قبل كل شئ بقول الحمد لله على كل شئ

الحمد لله كما يبنبغي لعظيم وجهه ذو الجلال و الإكرام

الحمد لله الذي لا يحمد على مكروه سواه

ثانياً أحب أشكر كل اللي دعوا لوالدتي و سألوا عليها و بعتوا لها السلام

أنا كنت بشوف كل تعليقاتكم و بنشرها في حدود الوقت المتاح بس للأسف ماكانش بيكون في وقت كفاية اني أرد على كل تعليق بس آديني بشكركم كلكم شكر جماعي و يا رب ماتحرمش منكم أبداً و لا من سؤالكم علينا

أطمنكم على والدتي هي الحمد لله عملت العملية و العملية تمام و الحمد لله بس طبعاً هي تعبانة شوية لإن جرح العملية كبير و ركبت شريحة كبيرة 15 سنتيمتر بس الحمد لله على كل حال

مش عايزاكم تنسوا تدعوا لها من قلبكم احنا في العشرة الأواخر ربنا يستجيب دعواتكم و يهون عليها فترة الرقاد و يهون عليها الآلام

و شكراً مرة تانية لكم جميعاً

نسألكم الدعاء

السلام عليكم و رحمة الله و بركاته

أولاً طبعاً عايزة أقول لكم كلكم كل سنة و انتم بألف خير و سلامة و ربنا يتقبل مننا و منكم صيام الشهر الكريم و يرزقكم و إيانا بمغفرة و عتق من النار قبل أن ينتهي إن شاء الله

ثانياً أنا عايزة أعتذر لكل أحبابي و أصدقائي الذين أرسلوا لي تعليقات على تدويناتي الفترة اللي فاتت و لم أرد عليهم لإن ظروفي لم تسمح لي على الإطلاق

أخيراً و ليس آخراً إن شاء الله أنا بطلب منكم جميعاً الدعاء لوالدتي في هذه الليلة المفترجة و هذه الأيام المفترجة ان ربنا يهون عليها و ييسر لها حالها. هي هتعمل عملية يوم الأحد القادم إن شاء الله لتركيب شريحة في ساقها لوجود كسر مضاعف في عظمة الساق الرئيسية و من بعدها ستلازم الفراش لأربعة أشهر دون حركة من الفراش نهائياً و من بعدها شهرين علاج طبيعي

فلن أوصيكم ادعوا لها ربنا ييسر لها العملية و تخرج منها بالسلامة و يهون عليها فترة الرقاد و يهون عليها لان حالتها النفسية سيئة للغاية

و مرة تانية كل عام و أنتم جميعاً بألف صحة و سلامة

عندما توقن أن لك أصدقاء

طول الوقت و أنا عارفة ان لي أصدقاء كثير و الحمد لله صحيح هم من إتجاهات مختلفة في الحياة و يمكن يكونوا هم شخصياً ما يعرفوش بعض إنما هم كلهم أصدقائي

و صحيح برضه انه مش كلهم لهم نفس المعزة عندي و لكن بحبهم كلهم مع إختلاف درجات الحب دي

و لكن يوم الأربعاء اللي فات أدركت يعني ايه تحب قوي في الله و يعني ايه ان الصداقة ترتفع لمرتبة الأخوة

كنت أجازة في البيت و أجازة مش مترتبة جت كدا على فجأة و أنا أوقات كتير لما بكون أجازة في البيت من باب التغيير بحاول أعمل حاجات مختلفة فكنت بتفرج على برنامج صباحك سكر زيادة على قناة OTV

و في أول الحلقة قالوا انهم هيستضيفوا كاتبة صحفية من جريدة الأهرام و هتتكلم عن كتاب جديد اسمه نامت عليك حيطة

الأول لما سمعت اسم الكتاب عدى على ودني كدا و بعدين لقيتني بقول ايه دا؟ دا كتاب نهى معقولة أخيراً هشوف برنامج تليفزيوني عن نهى و كتبها و بقيت متحمسة جداً و مستنية الفقرات تخلص بسرعة علشان تيجي الفقرة دي

و بقيت قاعدة قدام التليفزيون زي ما يكون حد ممسمرني مش بتحرك من مكاني و بسمع كل كلام الصحفية عن نهى و مدونتها و كتابها و طريقة كتابتها و جسمي كله مقشعر و فرحانة جداً و من كتر فرحتي حسا بالدموع في عيني و دي برضه كانت أول مرة أعرف يعني ايه دموع الفرحة

بعد ما الفقرة خلصت كنت عايزة أكلمها في التليفون مش عارفة هقول لها ايه بس عايزة أكلمها و خلاص و كان موبايلي فاصل شحن و الشاحن مختفي و ما عرفتش أكلمها الا تاني يوم صحيح ماعرفتش اوصل لها بس لسا عندي إحساس إني عايزة أكلمها على الرغم اني مش عارفة أقول لها ايه

المهم اني عرفت درجة جديدة من الغلاوة في الصداقة ماكنتش مدركاها و فرحانة انه الدرجة دي ظهرت لواحدة بريئة و حبوبة و صدوقة زي نهى

مبروك يا نهى و يا رب أشوف كل نجاح ليكي و أفرح بيه و احنا أصدقاء و أخوات قريبين من بعض

عربة الفول

من فترة وجدنا عربة فول وقفت قريباً من منزلنا على مفترق طرق في موقع متميز قريب من النادي و أمام مول به أكثر من كافيه و المنطقة الحق لله متميزة جداً جداً

و لما وجدنا ان اللي واقف على العربية شاب صغير قلنا ربنا يبارك له المكان كويس جداً و احنا في الصيف كل الشباب اللي بيسهروا في النادي و في الكافيهات هيتعاملوا معاه و احنا كمان داخلين على رمضان و دا موسم الفول المدمس و كل سكان المنطقة هيتعاملوا معاه

طبعاً أنا عارفه انه كثير هيهاجموني ويقولوا لي اعتبارات الصحة و التلوث و الكلام دا كله و طبعاً أنا موافقكم جداً بس أنا ساعتها أكثر حاجة بصيت لها و عجبتني ان دا شاب صغير لم يستسلم للبطالة و أوجد لنفسه حل ياكل بيه عيش و يدخل لنفسه رزق حلال و عجبني.

المهم ان بعد يومين أو ثلاثة أيام على أقصى تقدير و أنا رايحة لعملي الصبح لقيت البلدية بيشيلوا له العربية علشان قال ايه إشغال الطريق.

بقيت بخبط كف على كف هم عايزين ايه ما يسيبوه ياكل عيش و بعدين هو واقف في مكان لا يمثل فيه أي إشغال للطريق. و بعدين يعني هم مسكوا في دا و سابوا المقاهي و المحلات اللي بتحتل الرصيف كله و جزء من الشارع. سابوا المحلات اللي بتفتح تحت العمارات السكنية بدون تراخيص لإن دا ممنوع أصلاً؟

يعني كل دول مش إشغال طريق و الولد المسكين دا هو اللي إشغال طريق؟؟

هترجعوا تاني و تقولوا لي بس تلوث الطعام و الأمراض و غيره و غيره. طيب ما هو في عربيات من بتاعة مشاريع الشباب بتبيع خضار و فاكهة و أكل يعني في قوانين بتضمن ان اللي بيبيعوا على عربيات متجولة يكون في رقابة من الصحة عليهم.

ايه المانع ان دا يكون كمان على العربيات المتجولة اللي مش تبع مشاريع الشباب التابعة للدولة علشان مش كل الشباب يقدروا على قروض الشباب و أقساطها؟

ايه المانع اننا نيسر الإجراءات دي علشان نشجع الشباب انهم ينفذوا الإجراءات دي من غير عقد علشان نشجعهم يلتزموا بالقوانين و نضمن في نفس الوقت صحة الناس اللي هياكلوا من على العربيات دي؟

هو مش دا أحسن من ان الشباب دول يقعدوا فاضيين على القهاوي و يشربوا الشيشة بالبلاوي اللي عليها و يدمنوا المخدرات و نسمع عن الحوادث البشعة اللي بنسمع عنها من سرقة و قتل و إغتصاب؟

و بعدين أكيد يعني لو كان الولد دا فتح دماغه كدا و دفع لبتوع البلدية دول قرشين محترمين ماكانوش سحبوا عربيته. و مش بعيد بعد شوية نلاقي الولد دا رجع تاني بعربيته هو أو واحد غيره يسمع عن انه كان في هنا عربية و شغلها ماشي و يأجروا له المكان دا بمبلغ يومي زي ما بيعملوا مع المطاعم و القهاوي علشان يسيبوه و نبقى أجبرناه انه يكون راشي علشان يعرف ياكل عيش.

و يبقى بشكل أو بآخر برضه بعد عن الرزق الحلال و بالاكراه.

و النبي دا حلال و لا حرام؟؟؟

ارحمونا و ارحموا شباب البلد دي علشان ربنا يبارك لنا و يبارك في بلدنا

عالم صوفي

الصورة بعدسة حبيبتي شيماء- الصراحة

من فترة حبيبة قلبي نهى محمود و المعروفة عند الكثيرين بإسم كراكيب و اللي هو إسم مدونتها عملت مدونة جديدة إسمها عالم صوفي و لم تعلن إن المدونة دي ملكها

و في يوم دخلت و علقت على تدوينة عندي بإسم عالم صوفي فزرت المدونة علشان أعرف مين مالكها قرأت التدوينات الموجودة بها و لم أشعر أن هذه الكتابة غريبة عليَّ دي كتابة نهى فإتصلت بها

أنا: نونا انتي عملتي مدونة جديدة؟؟

نهى: هيهيهيهيهيهيييييييييي (دي ضحكة نهى اللي بتحاول تخليها خبيثة و عمرها ما عرفت لإنها أكثر بنوتة بريئة عرفتها في حياتي) إشمعنى يعني؟؟

أنا: أصل في مدونة زارتني إسمها عالم صوفي و لما زرتها و قرأتها حسيت انها كتابتك انتي عالم صوفي مش كدا؟؟؟

نهى: هيهيهيهيهييييييييييييي أيوة. أصلي بصراحة كنت حاسا اني عايزة أكتب من غير ما أحس اني مكشوفة قوي قدام كل اللي بيقروا كراكيب فكتبت عالم صوفي حاجة لي لوحدي

وقتها طبعاً أنا فرحت قوي اننا بالقرب دا من بعض و انها ما خبتش عليَّ اللي جواها و عرفتني على عالم صوفي

و فضلت متابعة المدونة و ماقلتش لحد إنها نهى إلى أن وجدت الإعلان عند شوشو/ الصراحة و عرفت ان في ناس بدأت تهاجم عالم صوفي و تتهمها بالسرقة من نهى محمود فاضطرت انها تعلن انها فعلاً نهى محمود و مش بتسرقها و لا حاجة

فقلت أنا كمان أعمل إعلان عندي و أقول لنهى

نونا حبليبة قلبي انتي لازم تفرحي اللي بيحصل دا إعتراف من كل اللي بيقرأ لك ان أسلوبك مميز و إننا بنتعرف عليه طول الوقت لانه بيميزك عن غيرك كثير و بعدين فيه اللي بيدافع عنك و عن كتابتك

و بعدين سواء كراكيب و لا عالم صوفي نهى هتفضل نهى :)

مشروب الطاقة

بصراحة أنا لما كتبت التدوينة بتاعة القهوة و الشيكولاتة ماكنتش متخيلة إني هلاقي الإقبال دا و لا إن أغلبية صديقاتي المدونات هيطلعوا بيشاركوني الحب دا


و عليه أنا قررت أهاديكم كلكم بهدية يا رب تعجبكم في الحر دا بس دا مش معناه اني هقلبها مدونة مطبخية هي الهدية دي و خلااااااااااااااااص :)


بصوا أنا هديكم وصفة مشروب الحق لله هو مش من إختراعي. دا إختراع واحدة من أعز صحباتي و هي كمان زيينا بتموت في القهوة. و هي مسمية المشروب دا مشروب الطاقة و هو فعلاً بيعمل إنتعاشة و طاقة كدا جبارة :) يللا على الطريقة


* المقادير:
كوب لبن مثلج
كوب ماء مثلج
شوية مكعبات ثلج قد 10 أو 15 مكعب
6 ملاعق صغيرة نيسكافيه
3 ملاعق صغيرة بس مليانة كاكاو نيسكويك
9 ملاعق صغيرة سكر أو حسب الرغبة ممكن تزودي السكر أو تقلليه حسب مزاجك و انتي بحبي السكر قد ايه


نحط كل المقادير دي في الخلاط و نضربها كويس لحد ما النيسكافيه و النيسكويك و السكر يدوبوا بس لازم يفضل فتافيت تلج مجروش بتخلي الطعم أحلى و المشروب منعش أكثر و المقادير دي بتعمل 3 كوبايات كبار


و بعدين بنصب في كوبايات و نزين فوق الوش بكريم شانتي زي الصورة اللي فوق دي


و ممكن نزين وش الكريم شانتي برشة كاكاو أو بصوص شيكولاتة زي الصورة دي

بس أنا بصراحة زينته بصوص كراميل بدل صوص الشيكولاتة و طلع طعمه تحفة

و في حاجة كمان بدل الكريم شانتي تزيد المشروب إنتعاشاً نحط فوق الوش بولة آيس كريم شيكولاتة و فانيليا زي آيس كريم كرنفاليتا كدا أو فانيليا بس أو شيكولاتة بس

و بصراحة بصراحة يعني في الحر دا موضوع الآيس كريم ألطف من الكريم شانتي

جربوا كدا و مستنية أسمع رأيكم كلكم :)

BON APPETITE