طول الوقت و أنا عارفة ان لي أصدقاء كثير و الحمد لله صحيح هم من إتجاهات مختلفة في الحياة و يمكن يكونوا هم شخصياً ما يعرفوش بعض إنما هم كلهم أصدقائي
و صحيح برضه انه مش كلهم لهم نفس المعزة عندي و لكن بحبهم كلهم مع إختلاف درجات الحب دي
و لكن يوم الأربعاء اللي فات أدركت يعني ايه تحب قوي في الله و يعني ايه ان الصداقة ترتفع لمرتبة الأخوة
كنت أجازة في البيت و أجازة مش مترتبة جت كدا على فجأة و أنا أوقات كتير لما بكون أجازة في البيت من باب التغيير بحاول أعمل حاجات مختلفة فكنت بتفرج على برنامج صباحك سكر زيادة على قناة OTV
و في أول الحلقة قالوا انهم هيستضيفوا كاتبة صحفية من جريدة الأهرام و هتتكلم عن كتاب جديد اسمه نامت عليك حيطة
الأول لما سمعت اسم الكتاب عدى على ودني كدا و بعدين لقيتني بقول ايه دا؟ دا كتاب نهى معقولة أخيراً هشوف برنامج تليفزيوني عن نهى و كتبها و بقيت متحمسة جداً و مستنية الفقرات تخلص بسرعة علشان تيجي الفقرة دي
و بقيت قاعدة قدام التليفزيون زي ما يكون حد ممسمرني مش بتحرك من مكاني و بسمع كل كلام الصحفية عن نهى و مدونتها و كتابها و طريقة كتابتها و جسمي كله مقشعر و فرحانة جداً و من كتر فرحتي حسا بالدموع في عيني و دي برضه كانت أول مرة أعرف يعني ايه دموع الفرحة
بعد ما الفقرة خلصت كنت عايزة أكلمها في التليفون مش عارفة هقول لها ايه بس عايزة أكلمها و خلاص و كان موبايلي فاصل شحن و الشاحن مختفي و ما عرفتش أكلمها الا تاني يوم صحيح ماعرفتش اوصل لها بس لسا عندي إحساس إني عايزة أكلمها على الرغم اني مش عارفة أقول لها ايه
المهم اني عرفت درجة جديدة من الغلاوة في الصداقة ماكنتش مدركاها و فرحانة انه الدرجة دي ظهرت لواحدة بريئة و حبوبة و صدوقة زي نهى
مبروك يا نهى و يا رب أشوف كل نجاح ليكي و أفرح بيه و احنا أصدقاء و أخوات قريبين من بعض
7 comments:
عزيزتي أم هاجر
أعجبتني هذه التدوينة جداً فهي تعبر بمنتهى الصدق عن أجمل معاني الصداقة والوفاء وقيمتها الغالية في زمن تعز فيه
واشاركك فرحتك بنهى فهي تستحق كل خير
أرجو أن تتقبلي مروري
عزيزتي هبة
أولاً أنا سعيدة جداً بمرورك بالمدونة و يا رب تنوريني دائماً
و فعلاً نهى تستاهل كل خير. و أنا متشكرة جداً لذوقك و كلامك الجميل و ربنا يرزقنا كلنا بالصداقة الحقيقية
:))
جميل أوي إحساسك
افتكرت فعلا أكتر من مرة حصلت معايا في ناس عمري ماشفتهم ولا سمعت صوتهم.... بس المضع فرق معايا جدا وأكتر من مرة عملت فرح في بيتي وانا قاعدة اقول لمامتي وأخويا إني مبسوطالهم :))). فعلا بتبقى علاقة من نوع خاص اوي ومش بناخد بالنا منها غير في أوقات المفاجأة دي
يارب دايما سعيدة يا أم هاجر
و بحب انت من الناس اللي أنا فعلا بحبها
من قلبي :)
:))
جميل أوي إحساسك
افتكرت فعلا أكتر من مرة حصلت معايا في ناس عمري ماشفتهم ولا سمعت صوتهم.... بس المضع فرق معايا جدا وأكتر من مرة عملت فرح في بيتي وانا قاعدة اقول لمامتي وأخويا إني مبسوطالهم :))). فعلا بتبقى علاقة من نوع خاص اوي ومش بناخد بالنا منها غير في أوقات المفاجأة دي
يارب دايما سعيدة يا أم هاجر
و بحب انت من الناس اللي أنا فعلا بحبها
من قلبي :)
mabrook for noha...and may God bless your friendship till forever isA :)
ازيك يا ام هجوره
وحشانى واللهى روزا بتسلم عليكى
بقى عندها بنوته جميله اسمها لامار
حلوه التدوينه وصعا بتبين قد ايه انت صديقه جميله واجمل حاجه فى الحياه ان يكون لك اصدقاء حقيقين
سلامى لهجوره
سلامى لماما فين بوستاتها الجميله حرمتنا منها ليه
*************
لا تكسر ابدا كل الجسور مع من تعزه فربما شاءت الاقدار
لكما لقاء اخر يعيد ما مضى ويصل ما نقطع .... فاذا كان العمر الجميل قدرحل
فمن يدري ربما انتظرك عمر اجمل
*******************
واذا قررت يوما ان تترك عزيزا فلا تترك له جرحا فمن اعطانا قلبا
لا يستحق ابدا ان نغرس فيه سهما
او تترك له لحظه الم تشقيه وما اجمل ان تبقى بيننا لحظات الزمن الجميل
Post a Comment