مش عارفة أنام

مش عارفة أنام خالص النهاردة.

رغم ان يومي كان مرهق و كله قلق و شد عصبي بس مش عارفة أنام

و رغم اني عارفة ان بكرة هيكون يوم متعب جداً جداً و محتاجة أكون مستعدة باني أنام كويس إلا اني لسا مش عارفة أنام

حسا اني زي العيال الصغيرة اللي لما يكون عندهم رحلة بيكونوا مش عايزين يناموا و عايزين الليل يجري بسرعة علشان الصبح يجي و يروحوا الرحلة

بس المشكلة ان الرحلة مش بكرة لكن بعد بكرة طيب أنا صاحية من الليلة دي ليه

علشان فرحانة اني هبدأ أستعد من بكرة؟

فعلاً أنا مفتقدة للتغيير قوي و بقالي كثييييييييييييييييير في دوامة من الحاجات الكثير اللي مش عارفة أوصفها الا بانها دوامة الحياة الطاحنة

و داخلين على أيام كلها زحمة و ان كانت كلها بركة برضه ان شاء الله بس زحمة و ارهاق فمن هنا جا الاحتياج الأكبر للتغيير

يعني انا كلي آمال عريضة ان الرحلة دي و ان كانت يوم واحد الا ان نفسي انها تغسل نفسيتي من جوا و تحقق لي راحة نفسية يكون فيها شحن كبير يكفيني الفترة الطويلة اللي جاية و ناوية من كل قلبي اني انبسط و أنسى أي حاجة تضايقني و أركز قوي انس أستمتع و أعمل كل الحاجات اللي وحشاني في الأماكن اللي بحبها و وحشاني

وحشتيني يا اسكندرية