منتظر الزيدي و حذائه

أول ما سمعت الخبر كنت فرحانة جداً. و طبعاً أقصد رمي منتظر الزيدي لبوش بفردتي حذائه. كان خبر غريب بس للوهلة الأولى يشعرك بالسعادة أو بمعنى أصح الشماتة في بوش أيوة فعلاً احنا شمتنا في بوش

بس لما شفت اللقطات المصورة بعد كدا في التليفزيون خالجتني الكثير من المشاعر المتداخلة و المتناقضة و بدأت أحلل مشاعري دي و فهمت التالي

أولاً اللي عمله منتظر الزيدي دا مش شجاعة زي ما أنا حسيت في الأول إنما هي جرأة و إندفاع للتعبير عن كبت و غضب لا حدود له من بوش و ما فعله بالعراق و العراقيين و بكل العرب في الواقع

هو فعلاً إندفاع بكل ما في هذه الكلمة من معاني لإنه ماحسبهاش صح.

طبعاً لا يوجد خلاف على أن هذه إهانة و إهانة شديدة كمان لبوش و إن الخبر إنتشر إنتشار النار في الهشيم في العالم كله و ناس من كل شعوب العالم سعدت بالخبر و تفاعلت معه بطرقها الخاصة حتى أنه ظهرت ألعاب على الانترنت لأعلى سكور في ضرب بوش بالأحذية !!!

هو لما رمى بوش بالحذاء كان رد الفعل إنه أهين إهانة أشد لما كل اللي حواليه و اللي معظمهم من أبناء بلده ضربوه ضرب شديد و بشع لدرجة اني لما شفت المنظر صعقت و صعب عليَّ جداً

بعدين دخل السجن و أكيد شاف في السجن على فعلته اللي ما حدش شافه

و فضلت طول الوقت أسأل نفسي يا ترى إحساسه ايه دلوقتي و أخوته أبناء وطنه بيبهدلوه على فعلة كل واحد فيهم كان نفسه يفعلها ؟

يا ترى إحساسه إيه و أبناء بلده بيعاقبوه على إحساسه بالغضب علي حالهم و من أجلهم؟

نيجي بقى لردود الفعل اللي بعد كدا من كل الشعوب العربية تحديداً. كالعادة ردود فعل عاطفية بحتة سميّنا حذاء الزيدي "حذاء الكرامة" يعني إيه بالضبط؟؟!! يعني كرامتنا كلنا كعرب تتلخص في حذاء الزيدي و في فعلة الزيدي؟؟!!

و النبي مش عيب علينا؟؟!! كرامتنا المفروض تكون في عقلنا اللي المفروض يخلينا نثور ثورة صحيحة على أوضاعنا و نقوم بتصحيحها و مانستناش حد ييجي يصلحها لنا و مانبصش للأمور بالشكل المشوش دا

إنما طول ما إحنا نايمين و ساكتين و راضيين باللي حكامنا و حكوماتنا بتعمله فينا و معانا منتظرين إيه من الآخرين؟ منتظرين ينظروا لنا إزاي و يتعاملوا معانا إزاي؟؟!!

حاجة كمان تعبتني جداً و وجعتني جداً العروض اللي إتعرضت لشراء حذاء الزيدي و المزايدات اللي تمت على هذا الحذاء و اللي أعلنت الحكومة العراقية أنها دمرته خوفاً من وجود متفجرات به!!

يعني لما مدرب المنتخب العراقي يعرض دفع 100 ألف دولار أمريكي ليحصل على حذاء الزيدي و لما بنت الرئيس الراحل صدام حسين تعرض مليون دولار أمريكي لنفس الغرض مش يبقى حرام؟؟!!

يعني لما الناس العراقيين دول و بشدد على صفة أنهم عراقيين معاهم كل الفلوس دي و مستعدين يدفعوها في حذاء فهو أولاً و آخراً حذاء ما بيساعدوش بيها أبناء وطنهم ليه في المحن اللي بيمروا بيها؟ ما بيستخدموهاش ليه علشان يخرجوا الاحتلال من بلدهم و ينهضوا بيه بعد كل المآسي التي مر بها هذا البلد؟؟!!

ألف ليه و ليه ظهرت في دماغي و مش عارفة أجاوب عليها. هو احنا امتى هنفوق من الغيبوبة اللي احنا فيها دي؟ امتى هنصحى و نتصرف صح؟ امتى؟؟؟؟؟؟؟؟؟

السيد منتظر الزيدي أشكرك على جرأتك و لكن سامحني فأنا أرى أنك لم تحسبها بشكل صحيح و كان من الممكن من موقعك أن تفعل ما هو أفضل و أكثر شجاعة و ما يؤدي إلى نتائج أفضل من هذا بكثير