الوعد

رغم إني في الأول كنت معترضة على مجرد إني أفكر في دخول السينيما لمشاهدة فيلم بطولته النسائية لروبي حتى و لو كان بطل الفيلم هو محمود يس، بس لما شفت الكرو بتاع الفيلم في برنامج البيت بيتك مع محمود سعد و عرفت إن الفيلم قصة وحيد حامد، تصوير محسن أحمد، موسيقى تصويرية تامر كروان، و إخراج محمد يس اللي أخرج فيلم دم الغزال قررت إن الفيلم أكيد فيلم ثقيل ما هو مش معقول عمل يجتمع فيه كل الناس المحترمة دي و يكون الفيلم أي كلام حتى و لو فيه روبي و رحت أشوف الفيلم فعلاً

فيلم الوعد هو فيلم محترم في وسط كل أفلام الهلس المنتشرة في السينيما دلوقتي. الإخراج أكثر من رائع و لا تفوت من المخرج الهفوة فتحس إنه بيحترم عقليتك. و التصوير مفيش كلام عليه طبعاً د/ محسن أحمد أكثر من رائع.

قصة الفيلم بالنسبة لي بتقدس معنى الوعد. يعني لما الواحد يوعد حد بحاجة لازم يحترم وعده و ينفذه مهما كانت الظروف. الفيلم كمان بيجسد العلاقة الحقيقية بين أقباط و مسلمين مصر. علاقة تتسم بالحب و التسامح مش زي ما عايزين يقنعونا انها علاقة مشحونة و مليئة بالتحفز و الخلافات. و طبعاً دا في إطار درامي فيه شوية أكشن

محمود يس- ممثل رائع كعادته و كما تعودنا منه. مهما حاولت أصف إنبهاري بأدائه في الفيلم دا مش هعرف. دور جديد عليه جداً و هو أداه بإقتدار شديد. و رغم إنه ظهر في النصف الأول فقط من الفيلم إلا إني مفتقدش حضوره في النصف الثاني من الفيلم كنت حسا انه موجود طول الفيلم

آسر يس- أكثر من ممتاز و له مستقبل رائع و أتوقع له صعود سريع لو استمر على نفس المستوى دا و اختار أدواره بدقة و تأني مش عشوائية تؤدي به إنه يتحط في قالب واحد

أحمد عزمي- أنا أعدت إكتشافه في الفيلم دا. من أول ما شفت أحمد عزمي و أنا كنت بقول انه ممثل ممتاز بس في الدور دا تخطى كل المراحل بجد كان أكثر من ممتاز و كلمة رائع لا تكفي لوصفه. أنا لولا انه اسمه أحمد و اني عارفة انه مسلم كنت قلت انه قبطي. أدى دور المسيحي بشكل ممتاز و فعلاً على قد ما كان في أول الأحداث متعصب و بيهاجم المسلم إلا إنه بعد كدا ظهر لنا إن دي كانت القشرة و إنهم أصبحوا اخوات

الممثل السوري غسان مسعود- ممثل بروح أحمد مظهر و لمحة من شكله و عرفت بعد كدا إنه هو الذي أدى دور صلاح الدين في المسلسل السوري صلاح الدين الأيوبي و تمنيت لو إني أشوف المسلسل دا. أداؤه فكرني بممثلين زمان و خصوصاً في الجزء اللي كان بيجسد فيه ولعه بالأحصنة و الفروسية و إنه إزاي الموضوع دا هو نقطة ضعفه و الحاجة الوحيدة اللي ممكن تكسر جبروته و تهد قوته على الفساد

باسم سمرة- أنا خليته للآخر علشان مش عارفة أقول ايه عنه طبعاً هو كممثل لا خلاف عليه و في الدور دا كان ممتاز بس مش عارفة كل الأدوار اللي شفت باسم سمرة بيؤديها لحد دلوقتي مخليا في حاجز بيني و بينه و حسا ان الحاجز دا مش هيروح بسهولة رغم انه ممثل له كاريزما منفردة و حضور متميز

مش عارفة حسا ان إعجابي بالفيلم خلاني متحيزة و كل كلماتي منبهرة بس يمكن اللي زود من دا إنه زي ما قلت في الأول علشان الفيلم دا ظهر في وقت كل الأفلام الموجودة هايفة و بتستهتر بعقليتنا

عموماً فيلم الوعد فيلم يستحق المشاهدة و ليس الرؤية