سيد حجاب

عمري ما إندمجت مع فن الشعر. دي حقيقة فعلاً مش عارفة ليه بس ما حسيتش انه بيستقطبني و يؤثر فيَّ. و إمبارح بالصدفة شفت برنامج إسمه "علمتني الحياة" بييجي على قناة المحور أنا مش متابعة البرنامج و ماعرفش إسم المذيع إيه بس أكثر حاجة عجبتني في هذا المذيع إنه مستمع جيد بمعنى انه بيعطي فرصة كبيرة للضيف إنه يتكلم و يخرج كل اللي جواه و بكدا يستفيد المشاهد أكبر إستفادة ممكنة لإن في الأساس المشاهد يهمه الضيف مش فذلكة السيد المذيع و دا نفس السبب اللي بيخليني بحترم الإعلامي الكبير حمدي قنديل و الإعلامي أحمد منصور.

المهم إن حلقة إمبارح كان الضيف فيها الشاعر سيد حجاب. طبعاً لإني مش قارئة للشعر فأنا كل معرفتي بسيد حجاب من أعماله المغناة و بالذات تترات المسلسلات. أكثر المسلسلات اللي أثرت فيَّ و علمتني حاجة و أراها دراما ممتازة تتراتها كلمات أغانيها من أشعار سيد حجاب يعني من القديم مثلاً "الوسية" و "المال والبنون" و "ليالي الحلمية" و "أرابيسك" دا من القديم و من أجدد الحاجات السنة اللي فاتت "شرف فتح الباب" و "هيما" و "عدى النهار".

أنا كنت بتابع مسلسل "شرف فتح الباب" كنت و مازلت مقتنعة ان المسلسل ممل و فيه تطويل مالوش أي لازمة بس كنت معجبة جداً بتتر البداية و النهاية و بجمل معينة فيه زيي الجملة اللي بتقول "و إزاي هنمشي صح و السكة معووجة؟!" و في رأيي إن التترات لخصت المسلسل بالكامل و حلت المعضلة اللي فيه كمان.

نفس الكلام ينطبق على تتر مسلسل "هيما" و اللي في أوله بتتكتب جملة "الكوميديا الشعبية" و دي فعلاً حقيقة. المسلسل كان رائع و أداء أحمد رزق و حسن حسني و عبلة كامل ممتاز و العمل كله متكامل برضه من الجمل اللي عجبتني في التترات "هي الناس حسا إيه؟ و لا الناس حايسة ليه؟ هي الناس عايشة ليه؟ و لا الناس عايزة إيه؟" حسيت ان الكلمات دي على قدر بساطتها بتلخص الواقع المرير اللي احنا عايشينه من إنعدام الهدف من الحياة و إنعدام الهوية.

و هنا بتيجي روعة كلمات سيد حجاب على قدر بساطته و صدقه على قدر احساسه بالواقع و معايشته له و لهمومه علشان كدا كلماته بتوصل ليَّ و بحسها جداً.

الحوار مع سيد حجاب كان رائع قد ايه هو شخصية مثقفة و هادئة و محترمة و إستفدت من الحوار كثير جداً. إتكلم عن كيفية كتابته لأشعار تترات المسلسلات بيقول إنه علشان يقدر يكتب أشعار تترات المسلسلات لازم يقرأ العمل الدرامي كله و يقتنع إن رسالة العمل تتفق مع قناعاته و إتجاهاته في الحياة و بعدين يختار سيتحدث بلسان أي شخصية من شخصيات المسلسل ولا إذا كان سيتحدث عن العمل بشكل كامل.

و رؤيته عن الأشعار اللي بيكتبها لتترات المسلسلات إنه بيفضل أنه يتعامل معاها من منظور الكورال في المسرح الإغريقي فساعات نجد الكورال في جزء من أجزاء المسرحية بيتكلم عن أحد الشخصيات و ساعات تانية بيتكلم عن الأحداث اللي بتحصل في الخلفية و كواليس العمل.

هو اتكلم في الحوار عن قصة مسلسل شرف فتح الباب و قال إن القصة وضعت خط تحت معضلة كبيرة بنقابلها كل يوم في حياتنا و هي الشخصيات اللي زيي الموظف اللي بيروح مكتبه يقلبه مسجد و يقضي طول اليوم في الصلاة و يعطل مصالح الناس و بعدين يفتح درج مكتبه علشان يأخذ رشوة و مش شايف أي تناقض بين التصرفين الصلاة و الرشوة يعني بالضبط نفس اللي حصل مع الشخصية المحورية في المسلسل و اللي كان طول الوقت شريف و لآخر لحظة ملتزم و بيصلي و متدين و أخطأ و إختلس المال العام و حلل لنفسه الخطأ و قال جملة عجبتني قوي "الشخصيات دي فاهمين الدين غلط دول لو يعرفوا، الدين دا هو الأداة اللي بتحرر النفس البشرية من القهر و اللي بيتمسك بدينه بيتحرر من كل قهر و بيعتصم عن كل خطأ و بيرضى بالكامل عن حياته زي ما هيَّ"

و في آخر الحلقة ذكر سيد حجاب بعض الدروس التي تعلمها من الحياة مثل "إنما زبد البحر يذهب جفاءاً و إن ما ينفع الإنسان يبقى في الأرض" و "إن العظيم ليس من يجعل الآخرين يشعرون بالفارق الكبير بينه و بينهم و إنما هو من يكتشف الكنوز الإنسانية العظيمة بداخلهم" أعتقد الكلمات دي تدينا فكرة عن شخصية سيد حجاب و أعتقد إني هبدأ أدور على أشعار سيد حجاب و أقرأها