البركة في البكور

أعرف ان في حديث شريف عن الرسول صلى الله عليه و سلم بيقول "البركة في البكور" و عمري ما فكرت في معنى الحديث الشريف دا إلا من أسبوعين بس

أيام الكلية كنت بصحى بدري جداً كنت بصحى كل يوم من أيام المحاضرات الساعة 5:30 علشان أكون في الكلية الساعة 7:30 لان محاضراتي بتبدأ الساعة 8:00 صباحاً لكن عمري ما قدرت حلاوة البكور لان الوقت كان بيبقى يا دوب لاني بتحرك من البيت الساعة 6:00 فيا دوب النصف ساعة اللي قبل مانزل بتكفيني أجهز و لو لحقت أفطر

و بعد ما خلصت الكلية و بدأت أشتغل كنت برضه بزنق نفسي و يا دوب أصحى قبل ميعاد شغلي بنصف ساعة او ساعة إلا ربع بالكثير. و بعدين من أسبوعين لقيتني بسأل نفسي هو أنا ليه بزنق نفسي كدا و بكون بالجري علشان ألحق و أروح الشغل و أنا حاسة اني بنهج و بكون لسا مافقتش و باخد وقت على ما ببقى في مود الشغل و أفوق ما أجرب أصحى بدري

و فعلاً جربت لقيت الموضوع يستحق فعلاً. صحيح في الأول كنت بتعب جداً لاني مش متعودة بس لقيتني باخد وقتي جداً و بحضر افطار و أفطر في البيت في ميعاد ثابت و و بفوق تماماً و بروح الشغل و أنا في مود كويس جداً فبدأت أنجز في شغلي كمان و أحس ان الوقت فيه بركة و أقدر أعمل في ساعات الشغل و في اليوم كله حاجات كتير جداً ماكانش ليها وقت قبل كدا

حتى هاجر بقت تصحى بدري معايا و تحب دا جداً لدرجة ان ماما بدأت تاخد بالها و تقول لي هاجر بقت تيجي لي فايقة على الآخر و مزاجها عالي جداً

و الأسبوع اللي فات حظي كان رائع و في يوم صحيت بدري قوي قوي و شفت لحظة الشروق مع لسعة البرد الخفيفة في بلكونة بيتي المنظر أكثر من رائع لحظة ظهور الخيط الأبيض من الخيط الأسود لحظة مش ممكن تتوصف بكلمات. سبحان الله و تبارك الخلاق على الجمال و الابداع في التصويرو لا 100 فنان يقدر يرسم لوحة فيها كل الجمال دا و كل الألوان المبدعة دي مش عارفة يومها حسيت اني مش هعرف أبدأ أي يوم بعد كدا من غير ما أشوف المنظر

و صدق رسول الله صلى الله عليه و سلم لما قال "البركة في البكور" ربنا ما يحرمنا أبداً من البركة دي