تاج وجب الرد عليه

بصراحة أنا مش بحب موضوع التاجات دا و بيفكرني بلعبة كدا كانت زمان لما كنا في إبتدائي و إعدادي بس مش عارفة اللعبة دي كان إسمها لإيه و لا إيه أهميتها هي برضه كانت عبارة عن أسئلة كتييييييييييييير كدا في كل حاجة و أي حاجة بنكتبها في كراسة و نديها لأصحابنا يجاوبوا على الأسئلة دي و كل حد من أصحابنا ينقل الأسئلة لنفسه و يجاوب لنا عليها و نحتفظ بالكراسة دي عندنا

المهم بقى انه مؤخراً لقيت الرقيق whispers بتمرر لي التاج دا و أنا رديت عليه علشان هي عزيزة علي بس

التـــــــــــــاج

لو قالوا لك اختار عصر من عصور مصر علشان تعيش فيه تختار اى عصر و فى عهد اى حاكم .. واشمعنى؟

عصور الملكية الخلافة الإسلامية حين كان المسلمين و بلاد المسلمين هم قادة العالمة و أكثر الناس تطوراً في كل المجالات و خصوصاً العلم و كان الغرب يستقي العلم مننا.
لما كان في قدوة صالحة ممكن نقتدي بها مثل عمر بن عبد العزيز و عمرو بن العاص و صلاح الدين الأيوبي.
لما كان المجتمع كله بيحض على الفضيلة و التمسك بالدين و طاعة الله
لما كان الناس بيحبوا بعض و بيحبوا وطنهو و هويتهم و بيغيروا عليها و بيتقدموا للأمام

أول أولويه فى حياتك عيلتك ولا شغلك ولااصحابك؟

عائلتي و يليها أصحابي و أخيراً شغلي بس للأسف ظروف الحياة بتخلينا في كثير من الأوقات نيجي على أصحابنا بسبب شغلنا

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

مش عارفة صعب ان الانسان يحكم على نفسه بس طبعاً اتمنى اني أكون عادلة. و أظن ان العدل علشان يتحقق لازم نعطي لكل ذي حق حقه و كل ذي قدر قدره. بمعنى إني مجيش على حق حد علشان حد تاني باختصار يعني الوسايط و المحسوبيات و في نفس الوقت لا أرفع من شأن حد و أعطي له أكبر من حجمه النفاق يعني و لا أخسف بقدر حد الأرض و أقلل من عمله و مجهوده و قيمته في الحياة

اللى بيبوظ الحكام .. نفسهم؟ ولا الشعب؟ ولا الحاشيه المقربه؟

نفسهم و الحاشية المقربة لهم أما الشعب ما بيفسدش الحكام انما لو الشعب فاسد فربنا بيبتليهم بجور الحكام كما ذكر في الحديث الشريف

مين أكتر اعلامي مصري بتحترمه؟

حمدي قنديل ، محمد حسنين هيكل و بحترمه كسياسي كمان، و أحمد منصور الخطيب و دا مذيع مصري على قناة الجزيرة هو محاور من الدرجة الأولى مهذب جداً و مثقف جداً و بيعد بدرجة ممتازة لبرنامجه و عنده قدرة رهيبة على التحكم في مجرى الحوار و الأهم من كدا انه مستمع جيد للضيف الذي يستضيفه قبل ما يكون متكلم جيد و دا بيدي فرصة للمتفرج انه يخرج بأكبر إستفادة ممكنة من الضيف.

لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

هي حاجة محتاجة موهبة مش موجودة عندي بس كنت أتمنى انها تكون عندي. كنت أتمنى اني أكون رسامة علشان بحب التعبير بالألوان جداً. و كمان كنت أتمنى يكون عندي مكتبة أبيع فيها كتب و أعمل فيها أنشطة ثقافية و خصوصاً للأطفال.

ايه تانى بلد تتمنى تعيش فيها بعد مصر؟

لندن عاصمة الضباب و باريس مدينة النور و الأهم من الاثنين المدينة المنورة حيث عاش رسول الله و استأنس بأهل المدينة

اوصف ليا ترتيبات اجمل فرح ممكن تحضره

فرح؟؟؟!!! مش عارفة بس لازم مايكونش فيه أغاني شعبية من المقرفة المنتشرة دلوقتي و الأهم ما يكونش فيه خناق على البوفيه علشان دا موضوع بيسبب لي حالة من القرف

بتراعي كلام الناس والقيل والقال؟ لو اه او لو لا قول لى ليه؟

كنت الأول بركز في الموضوع دا جداً و بعدين دلوقتي و لا بتفرق معايا طالما مقتنعة من جوايا اني بعمل الصح و اللي أحسن مني يقف و يحاكمني و برضه و لا هعبره

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

ما يفرقش معايا الموبيل و لا الكاميرا الديجيتال بس هفتقد الكمبيوتر جداً و لو اني برضه هكون سعيدة فكل ما كانت الحياة أبسط كل ما كانت أكثر سعادة

السعاده هى؟

كنت كتبت تدوينة قبل كدا عن الموضوع دا و في قناعتي ان السعادة هي الشعور بالرضا عن النفس و عن كل شئ يحيط بنا. و قمة

السعادة هي أن ينتج عن شعورك بالرضا إسعاد الآخرين و إرضائهم

عندك أمل ؟؟ أسبابك ؟

لازم يكون عندنا أمل طول الوقت مهما كانت الصورة قاتمة علشان نعرف نعيش بس كتير الأمل بيهرب مني

لما تحب تهرب من كل شئ بتروح فين؟

البحر وقت الشروق و وقت الغروب و لو دا مش متاح البلكونة مع رواية و مج نيسكافيه في الشتاء الصبح بدري في الشمس الدافئة

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

كتييييييييييييييير كل ما المسئوليات بتزيد أول مرة لما اشتغلت و بعدين لما اتجوزت و بعدين لما خلفت هاجر و دلوقتي مع كل يوم بيعدي و بكتشف يعني ايه مسئولية تربية طفل

لما بتعمل عمل خيرى بيكون ايه هو دافعك الاول؟

اني أتقرب إلى الله سبحانه و تعالى و بعدين علشان أساعد حد محتاج لمساعدتي و مش شرط تكون المساعدة دي مادية يعني ممكن تكون زيارة يتيم . علشان أسعد حد محتاج للسعادة و لو للحظات أتمنى اني أكون السبب فيها

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟

ما بشربش سجائر و الحمد لله و لما بشوف ست بتشرب سجائر مابحسش بحاجة بشوف دي حرية شخصية. هو تدخين السجائر في حد ذاته مضر و حرام سواء للرجل أو للمرأة فمش هتفرق كتير مين اللي بيدخن. بس بدعي ربنا يعافي كل مدخن و يرحمه و يرحم اللي حواليه من السجائر

بتعرف ايدك اليمين من الشمال ازاي؟

ايه السؤال الغريب دا؟؟ هو في حد ما بيعرفش إيده اليمين من الشمال؟؟!!

ايه اكتر آلة موسيقيه بتحبها ؟

الفلوت و الـ Jazz

فى رأيك ليه الذوق والنخوه اتعدموا؟

آه و من زمان قوي الله يرحمهم و علشان حاجات كتير قوي لو فكرت أكتبها مش هخلص النهاردة

ايه الحاجه اللى لو حصلتلك تبقى سعيد قوى؟؟؟

أكون مفيدة لنفسي و للحواليا و أكون بسعدهم و أحس بدا

تختار يبقى عندك...ارض زراعيه ولا احسن عربيات و لا كام عماره و لا فلوس فى البنك؟؟؟؟

أرض زراعية

البحر و لا النيل؟؟؟

البحر هو عشقي الأول و الأخير

مركب و لا طياره؟؟

بصراحة لا دا و لا دا أنا بخاف جداً من المركبات اللي بتتحرك في البحر و برتفع من المرتفعات ما بالك بقى بالطيران أنا يا دوب آخري العربية بس لو مضطرة أختار يعني يبقى المركب علشان أبقى قريبة في قلب البحر بس لازم تكون فيها كل الكماليات اللي تخليني أستمتع بالبحر

مجنون و لا عاقل؟؟

مجنونة ثم مجنونة ثم مجنونة لأبعد الحدود

تقرأ كتاب و لا تتفرج عليه فيلم؟

أقرأ كتاب. القراءة هي حياتي و متعتي الكبرى. بس برضه مفيش مانع أتفرج على فيلم يكون ممتع لو الفيلم كان فيلم أجنبي محترم زي ما بحبه دراما أو جريمة أو رومانسي و يكون في الشتاء و أنا متدفية تحت البطاينة و معايا كاكاو سخن ملهلب

تمرر التاج لمين؟؟

مش عايزة أذكر حد بالتحديد علشان أنا نفسي مش بحب موضوع التاجات دا لكن لو ضروري يعني يبقى
كراكيب- نهى
الصراحة
بهظ بيه