بصراحة أنا لما كتبت التدوينة بتاعة القهوة و الشيكولاتة ماكنتش متخيلة إني هلاقي الإقبال دا و لا إن أغلبية صديقاتي المدونات هيطلعوا بيشاركوني الحب دا
و عليه أنا قررت أهاديكم كلكم بهدية يا رب تعجبكم في الحر دا بس دا مش معناه اني هقلبها مدونة مطبخية هي الهدية دي و خلااااااااااااااااص :)
بصوا أنا هديكم وصفة مشروب الحق لله هو مش من إختراعي. دا إختراع واحدة من أعز صحباتي و هي كمان زيينا بتموت في القهوة. و هي مسمية المشروب دا مشروب الطاقة و هو فعلاً بيعمل إنتعاشة و طاقة كدا جبارة :) يللا على الطريقة
* المقادير:
كوب لبن مثلج
كوب ماء مثلج
شوية مكعبات ثلج قد 10 أو 15 مكعب
6 ملاعق صغيرة نيسكافيه
3 ملاعق صغيرة بس مليانة كاكاو نيسكويك
9 ملاعق صغيرة سكر أو حسب الرغبة ممكن تزودي السكر أو تقلليه حسب مزاجك و انتي بحبي السكر قد ايه
نحط كل المقادير دي في الخلاط و نضربها كويس لحد ما النيسكافيه و النيسكويك و السكر يدوبوا بس لازم يفضل فتافيت تلج مجروش بتخلي الطعم أحلى و المشروب منعش أكثر و المقادير دي بتعمل 3 كوبايات كبار
و بعدين بنصب في كوبايات و نزين فوق الوش بكريم شانتي زي الصورة اللي فوق دي
و ممكن نزين وش الكريم شانتي برشة كاكاو أو بصوص شيكولاتة زي الصورة دي
بس أنا بصراحة زينته بصوص كراميل بدل صوص الشيكولاتة و طلع طعمه تحفة
و في حاجة كمان بدل الكريم شانتي تزيد المشروب إنتعاشاً نحط فوق الوش بولة آيس كريم شيكولاتة و فانيليا زي آيس كريم كرنفاليتا كدا أو فانيليا بس أو شيكولاتة بس
و بصراحة بصراحة يعني في الحر دا موضوع الآيس كريم ألطف من الكريم شانتي
جربوا كدا و مستنية أسمع رأيكم كلكم :)
BON APPETITE
8 comments:
ya salam, geh fi wa2toh :))
ayam el sho3'l kont ba3mel a similar drink, but hot.
the mix of cacoa and coffee heya el 7aga el wa7eeda elly betsa7y el dema3'.
* Shaimaa Gamal:
أي خدمة يا شوشو كويس إنه عجبك جربي تعمليه و قولي لي رأيك عملي بعد ما تدوقي ;)
امممممممممممممممم
هدوخ كده
بجد توووووووووووووووحفه عاوزه اقوم اعمله بس انا دوخت بالفعل اقوم ازاى بقى!!!!!!!
ميرسى يا قمر
* وحي القلم:
سلامتك من الدوخة يا جميلة. و مستنية رأيك في الطعم أول ما تجربيه :)
أنا من الناس اللي بتحب تخترع في الحاجات دي :). فغالبا عملت زيه قبل كدة
و هو فعلا جميل ومناسب أوي للوقت دة
تسلم إيديكي يا فندم :)).حلوة الهدية دي
* Wish I were a Butterfly:
نورتيني يا فندم و مبسوطة ان الإختراع عجبك و بألف هنا وشفا :)
مممم شكله لذيذ
اعتقد ان زوجي هيحبه هو مدمن للنوع ده من المشروبات
يلا نجرب و ندعيلك انتي و صاحبتك :)
بوسه لهاجوره :)
*Rosa:
بألف هنا ليكي و لزوجك و يا رب يعجبه فعلاً و على فكرة أنا إمبارح كنت في كوستا و طلع لمشروب الطاقة دا إسم.
إسمه "Iced Mocha" و بيحطوا عليه كريم شانتي.
نورتيني و ماتغيبيش علينا قوي كدا :)
على فكرة هجورة كمان بعتا لك معايا بوسة كبيييييييييييييييييرة قوييييييييييييي
Post a Comment