لا يخفى عن كل القريبين مني و اللي يعرفوني قد ايه أنا مدمنة لكل ما هو من مشتقات القهوة و فعلاً بحس ان حبوب البن هي من نعم ربنا علينا
و من ساعة ما اكتشفنا كوستا من أكثر من 3 سنين و أنا مدمناه أنا و زوجي اللي بيحب القهوة بمشتقاتها هو كمان. المكان ليه جو خاص يحسسك بالحميمية و الدفء بألوانه المائلة للنبيتي و البني الغامق و الكراسي مريحة جداً و قول زي ما انت عايز عن نكهة البن الرائعة
هاجر بقى على ما أعتقد هي أصغر طفلة تشرب كابتشينو في كوستا و هي عمرها 6 شهور كانت معانا هناك و أخذت بالملعقة الكريمة اللي على وش الكابتشينو و مش هنسى يومها نظرة الذهول في عينين الويتر و هو بيسأل محمد هو "كدا طبيعي؟" و محمد بيرد عليه آه دا احنا هناخد واحد كابتشينو تيك أواي في الببرونة و احنا ماشيين
و رغم ان العيد اللي فات كان صعب شوية علشان عربيتنا عزيزة اللذيذة عملتها فينا و باظت إلا ان أول يوم العيد كان حلو جداً كنا في كوستا و مش هتكلم بقى هسيب الصور تتكلم و خصوصا الصورة الأولى و هاجر عاملة تحية فيفا كوستا مع صورة الحاج كوستا الكببير
كمان في اليوم الثاني بعد العيد كنا بنفطر هناك و برضه دا كان من أحلى الزيارات اللي زرناها لكوستا لأن دا أحلى فرع لكوستا في الدنيا كنت يومها مع أكتر ناس بحبهم في الدنيا في مكان من أكتر الأماكن اللي بحبها و بشرب أكتر مشروب بحبه في الدنيا و مع دا كله قدام بحر اسكندرية
و كان كفاية علي كدا العيد و مش مهم عطل العربية و لا ان العيد نفسه ضاع في تصليحها
4 comments:
ento bethazaroooooooooooooooo
ento konto fe Alex... we kaman ma2olotosh
Mashi ya bashar
لك حق تزعل يا بهظ بيه بس و الله غصب عننا انت مش متخيل اللي حصل لنا بسبب العربية احنا قضينا الكام يوم اللي قعدناهم هناك ما بين الميكانيكي و محلات قطع الغيار و البيت و كانوا هم اليومين اللي أنا كتبت عنهم و آخر يوم كتبت عنه دا كان يوم السفر قبل ما نتحرك من اسكندرية مباشرة يعني مش يوم كمان ):
بس انت و الله لك وحشة هتيجي امتى؟
ههههههههههه ما شاء الله على العسل الكييفه دى
يعنى هتطلع لمين؟
انا بس عاوزه اسأل ازاى جالكو قلب تشربوهاوهى فى السن الصغنون ده؟؟؟؟؟
بس عيد مزااااااااااج
انا بقى اللى كده بالنسبال الكاكاو السخن خصوصا فى اشتا بس لازم يكون نسكويك وانا اللى اعمله لأن ليه ظبطه معينه فيه كده بحس انه مزاااااااااج كفايهانه من مشتقات الشيكولاته
انتي عارفة بقى يا دوب الكريمة اللي فوق الوش يعني حاجة مش جامدة قوي (:
أنا كمان بحب الشيكولاتة قوييييي و هي عشقي الثاني و بحب الكاكاو جداً و يا سلام بقى لو في الشتاء و متكلفتة تحت البطانية و قدام فيلم أجنبي
قولي لي بقى بتعملي النيسكويك ازاي؟ علشان أتعلم طريقتك الحلوة و أجربها
شرفتيني بزيارتك للمدونة يا رب تكون عجبتك و تزوريني دايماً
Post a Comment